Paggamit Ng Makrong Kasanayan At Makabagong Kagamitan Na Makatutulong Sa Pagkatuto Ng Wikang Filipino Ng Mag-Aaral

Vol.3, No.2

Abstract

Ang ating wika ay napakahalaga dahil tinutulungan tayong  mga mamamayan na magkaroon ng pagkakaisa at isang susi sa  pag-asenso ng ating bansa. Binibigyan tayo nito ng  pagkakakilanlan, pagkakaisa, at pagkakaintindihan. Kaya naman malaki ang ginagampanan ng wikang Filipino sa ating mga buhay.  Bilang isang Pilipino, ating linangin at payabungin ang ating wika sa  paraan na gamitin ito ng maayos at may kabuluhan. At batay sa  Konstitusyon ng Republika ng Pilipinas 1987, Artikulo XIV Seksyon  6, na ang wikang pambansa natin ay Filipino, kaya naman ito ay  kailangan nating pagyamanin pa. Kaya naman bilang isang  Pilipinong mag-aaral, tungkulin nating bigyang pagpapahalaga at  linangin ang ating wika. Ngunit paano natin mabibigyang halaga at  malilinang ang ating wika kung hindi natin ito nagagamit nang  maayos? 

Ayon kay Manalus (2021), nakatutulong ang mga makrong  kasanayan sa paglinang ng kakayahang pangkomunikatibo ng mga  mag-aaral upang lalong maging bihasa sa pag-aaral at  pagpapaunlad pa ng ating wika. Kaya naman ang pag-aaral na ito  ay nilayong malaman ang mga posibleng estratehiyang  makatutulong sa kakayahan sa paggamit ng wikang Filipino ng  mga mag-aaral.  

Ang pag-aaral na isinagawa ng mga mananaliksik ay  gumamit ng deskriptibong pamamaraan at purposive sampling teknik na kung saan pumili ng tatlumpung (30) mag-aaral sa  ikalawang taon ng Edukasyon medyor sa Filipino ng Bestlink  College of the Philippines. Na kung saan sila ay sasagot sa  inihandang talatanungan ng mga mananaliksik. Ang ganitong uri ng  metodo ay nagnais na mabigyan ng kasagutan ang mga  katanungan sa pamamagitan ng talatanungan na siyang magiging  gabay sa paggamit ng makrong kasanayan at makabagong  kagamitan na makatutulong sa pagkatuto ng wikang Filipino ng  mag-aaral.  Pinakamarami ang mga respondente na babae at higit na  kinapalooban ito ng edad 18-20. Lumabas na ang lahat ng  respondente na nakibahagi sa pagsagot ng talatalungan ay  mayroong kinahaharap na kahinaan sa wikang Filipino. Sa aspeto  ng Pakikinig mula sa kung ano ang mga makrong kasanayan na  makatutulong sa kakayahan sa paggamit ng mga mag-aaral sa  wikang Filipino. Nagresulta na mas maraming respondente ang  sang-ayon na labis na nakatutulong ang pakikinig sa talakayan sa  Filipino ng walang sagabal na nagkamit ng 4.70 na kabuuang  bilang. Sa Pagsasalita, nagkamit ng kabuuang bilang na 4.73 sa  pakikipag-usap gamit ang wikang Filipino. Sa Pagbabasa na may 4.83 na kabuuang bilang sa pagbabasa ng aklat o e-books sa  wikang Filipino. Sa aspeto ng Pagsusulat na nagkamit ng 4.53 na  kabuuang bilang sa paggawa ng mga akdang pampanitikan. Sa  Panonood, nagkamit ng 4.57 na kabuuang bilang ang panonood ng  bidyo sa wikang Filipino. Ang mga makabagong kagamitan na  maaring makatulong sa pagkatuto ng mga mag-aaral sa wikang  Filipino ay ang recorder para sa pakikinig na may kabuuang bilang  na 4.30, madalas na nakatutulong. Sa Pagsasalita, nagkamit ng  4.33 na kabuuang bilang ang cellphone. Sa Pagbabasa, may 4.57  na kabuuang bilang para sa aklat o e-books at Google. Sa  Pagsusulat, cellphone na nagkamit ng 4.87 na kabuuang bilang. Sa  Panonood, ang cellphone na may 4.68 na kabuuang bilang. Sa  paggamit sa mga makabagong kagamitan na maaaring makatulong sa pagkatuto ng wikang Filipino, sa aspeto ng Pakikinig ay  nagresulta na sang-ayon ang mga respondente na magagamit ang  recorder at cellphone. Sa Pagsasalita, nakatutulong ang cellphone na may 4.5 na kabuuang bilang. Sa Pagbabasa, nagkamit ng 4.53  na kabuuang bilang ang cellphone para makapanaliksik tungkol sa  wikang Filipino. Sa Pagsusulat, gamit ang cellphone ay maaaring  makahanap ng mga ilang software o applications na magagamit sa pagsusulat sa wikang Filipino na may kabuuang bilang na 4.80. Sa  Panonood, nagkamit ng 4.63 na kabuuang bilang ang paggamit ng  cellphone tulad ng panonood ng mga bidyo batay sa wikang  Filipino. At panghuli, sa tulong ng pag-aaral na ito ay mas  makapipili ang mga mag-aaral ng mga estratehiya o paraan na mas  aplikadong makatutulong sa pagkatuto nila at dahil sa mga  estratehiyang nabanggit mas magiging pamilyar sila sa iba pang  mga salita sa wikang Filipino. 

Ang ipinakitang resulta ng pag-aaral ay para sa mga mag aaral, guro, administrasyon ng paaralan, mga mambabasa at  susunod na mananaliksik upang maging gabay sa paggamit ng  makrong kasanayan at makabagong kagamitan na makatutulong  sa pagkatuto ng wikang Filipino ng mag-aaral.