SARIBUHAY SA PAGTUTURO: ANG PAPEL NG FILIPINO SA PAGLINANG NG KAMALAYANG PANGKALIKASAN GAMIT ANG PANUNURING PANDISKURSO SA MGA FACEBOOK VIDEOS NI CELINE MURILLO

Abstract

Ang social media, tulad ng Facebook, ay isang epektibong plataporma sa pagpapalaganap ng mga adbokasiyang pangkalikasan sa Pilipinas (Caballero at Caballes, 2020). Mahalaga ang paggamit ng wikang Filipino sa diskursong pangkalikasan dahil ito ay mas nauunawaan ng nakararami at nakatutulong sa pagpapalakas ng pagkilos (Tupas at Lorente, 2014; Constantino at Atienza, 2016). Ayon kina Pascua (2019) at Villanueva (2017), mas nagiging epektibo ang mensahe kung ito ay inihahatid gamit ang katutubong wika. Isa sa mga halimbawa nito ay si Celine Murillo, na gumagamit ng Facebook upang talakayin ang mga isyung pangkalikasan sa simpleng Filipino, na mas madaling maunawaan ng publiko (Murillo, 2022). Susuriin ng pananaliksik na ito ang kaniyang mga bidyo gamit ang panunuring pandiskurso ni Fairclough (1992) upang matukoy ang bisa ng paggamit ng wikang Filipino sa pagpapalaganap ng kamalayang pangkalikasan. Ang pag-aaral na ito ay isang pagsusuri sa mga bidyo ni Celine Murillo gamit ang Critical Discourse Analysis (CDA) ni Fairclough (1992) upang suriin ang papel ng wikang Filipino sa pagbabahagi ng kaalaman hinggil sa konserbasyon ng kalikasan. Isinasagawa ito sa pamamagitan ng kwalitatibong pamamaraan, na nagbibigay-diin sa masusing pag-unawa sa nilalaman at konteksto ng diskurso.  Bilang bahagi ng metodolohiya, gagamitin ang textual analysis upang siyasatin ang mga salitang ginagamit, estilo ng pagpapahayag, at estruktura ng diskurso sa mga bidyo. Layon nitong tukuyin kung paano nakatutulong ang simpleng gamit ng wikang Filipino sa pagpapalaganap ng kamalayang pangkalikasan, at kung paano nito naaabot ang mas malawak na audience, lalo na ang mga hindi bihasa sa teknikal na terminolohiyang pangkalikasan. Sinuri ang mga bidyo ni Murillo batay sa wika, diskurso, at estratehiya sa pagpapaliwanag ng impormasyon. Gumamit siya ng malinaw at payak na Filipino, retorikal na tanong, at personal na karanasan upang gawing relatable ang talakayan. Binibigyang-diin din niya ang lokal na konteksto upang palalimin ang koneksyon ng tagapanood sa mensahe. Napatunayan sa pagsusuri na epektibo ang paggamit ng wikang Filipino sa digital na midya sa pagpapalaganap ng kaalamang pangkalikasan. Sa kabuuan, ipinakita ng pananaliksik na ang social media ay isang makapangyarihang kasangkapan sa pagpapalakas ng kamalayang ekolohikal ng mga Pilipino. Ipinakita ng pananaliksik na epektibong nagagamit ang wikang Filipino sa social media, partikular sa mga bidyo ni Celine Murillo, bilang kasangkapan sa pagpapalaganap ng kamalayang pangkalikasan. Mas madaling nauunawaan at naiuugnay ng publiko ang mga isyung pangkapaligiran kapag ito ay ipinaliliwanag sa wikang kanilang kinagisnan. Ang pagsasanib ng wikang Filipino, teknolohiya, at adbokasiyang pangkalikasan ay nagpatunay na nakapagdudulot ito ng mas mataas na antas ng interaksyon at partisipasyon mula sa mga Pilipino.  Bunga nito, inirerekomenda ang mas malawak na paggamit ng wikang Filipino sa mga platapormang pang-edukasyon at social media upang higit pang mapalawak ang kaalaman at magsilbing mitsa ng kolektibong aksyon para sa pangangalaga ng kalikasan. Sa kabuuan, pinatotohanan ng pag-aaral na ang wika ay hindi lamang midyum ng komunikasyon kundi isang makapangyarihang instrumento sa pagpapalakas ng kamalayang ekolohikal at pagbubuo ng pambansang identidad.